Alibeaj vjen nga protesta drejt e në studio: Protestuesit shkundën letargjinë politike të 35 viteve

Juristi dhe ish-deputeti, Enkelejd Alibeaj i ftuar këtë të martë në “Now” me Erla Mëhillin në Euronews Albania ka folur lidhur me protestat e qytetarëve kundër ndërtimit në Zvërnec. Alibeja bëri me dije se ishte pjesë e protestës para së të bashkohej me panelin e të ftuarve.

Ai theksoi se këto protesta në 3 ditët e fundit kanë treguar se qytetarët janë zgjuar nga liturgjia e injektuar nga politika. Sipas tij protesta tregoi se qytetarët nuk kanë nevojë për udhëzimet e partive të mëdha duke treguar se në fakt ka jetë edhe pa to.

“Po, kaq pikëpyetje të mëdha dhe habi të mëdha kam edhe unë me thënë të drejtën, në kuptimin që shoqëria shqiptare prej kaq e kaq kohësh në fakt kishte rënë në një farë letargjie. Një lloj letargjie të ekzistencës apo jo, të nervit të qytetarisë, nervit politik të qytetarisë jo atij partiak, për ta për të bërë dallimin.

Dhe me thënë të drejtën, gjëja e parë që do vijë në mendje është: pse kjo, pse ajo, pse tani, kush është mbrapa? Jam munduar, por në fakt kam bërë një zgjidhje tjetër në analizën time të vogël me thënë të drejtën, për të parë deri tani në këto tre ditët e para çfarë ka arritur?

Për faktin se po vij nga protesta. Sapo erdha. Dhe çfarë më rezulton shpejt e shpejt? Gjëja e parë, ajo që sapo thashë, është akti i parë pas 35 viteve, që nga ’90 e këndej ku është sfiduar pikërisht kjo letargjia e injektuar nga politika.

Që ngjarjet politike në këtë vend i bëjnë partitë politike, kryesisht ato të mëdha, o njëra o tjetra, që pa udhëzimin e tyre nuk ndodh asgjë dhe pa to nuk ka jetë. Në fakt, ndërkohë që jetë ka. E dyta, se është pikërisht kjo: më në fund shoqëria shqiptare, dhe këta janë një pjesë përfaqësuese e shëndetshme e shoqërisë shqiptare, ka treguar vetëiniciativë.

Shumë e rëndësishme kjo. Pra, kanë sfiduar të gjithë panoramën partiako-politike në Shqipëri. Për mua ky është një nivel i lartë i emancipimit politik të një shoqërie. E treta, ka qytetari”, tha ai ndër të tjera.