Allegri i hap luftë ligjore Milanit dhe i “vjedh” Rabiot! Do jetë një Napoli i ri “akull”

De Laurentiis dëshiron t’i dhurojë trajnerit një skuadër që të pretendojë menjëherë nivelet më të larta.

Max Allegri dhe Milani nuk janë ndarë mirë. Situata e zgjidhjes së kontratës e tregon qartë. Mes palëve diskutohet ende mes mbylljes me konsensus e bashkëpunimit dhe shkarkimit, që do të sillte zhvillime ligjore më pas. Trajneri nuk e ka pritur mirë njoftimin e shpërndarë nga klubi dhe më pas nga mediet, para se të kishte një komunikim zyrtar me të.

Dokumenti formal, i firmosur nga presidenti Scaroni, shkoi tek Allegri 4 ditë më pas. Për këtë arsye mund të ketë një gjyq së shpejti, që ka të bëjë me prishjen e imazhit. Në anën tjetër, Allegri kishte një akord me De Laurentiis para mbylljes së kampionatit.

Presidenti i Napolit dhe drejtori sportiv Manna duan t’i dorëzojnë trajnerit një skuadër të denjë për të pretenduar trofe. Dhurata e parë për trajnerin mund të jetë Adrien Rabiot. Mesfushori francez e ka ndjekur gjithmonë trajnerin livornez dhe ideja e Allegri-t është që ta ketë sërish në dispozicion.

Për portën Napoli synon Matej Kovar dhe është në tratativa me PSV-në. Për mbrojtjen janë në listë dy emra: Mario Gila dhe Dodo. Manna ka gati një formacion që kthehet nga huazimet për të sistemuar dhe kështu mund të krijojë një bazë të mirë ekonomike, që do ta ndihmonte për t’i dhuruar trajnerit një grup më në linjë me idetë e tij.