“Ardhja e Alonso një lajm i shkëlqyer për Chelsea, kemi edhe dy ndeshje për të kapur Europën”

Trajneri aktual i Chelsea, Calum McFarlane, ka folur me superlativa për ardhjen e Xabi Alonso në stolin e “blues” sezonin tjetër. Deklarata ka ardhur pak orë para ndeshjes që Chelsea do të luajë sot ndaj Tootenham në Premier League, me shpresën që të kapë një vend në Europë sezonin tjetër.

“Ardhja e Alonso është një lajm vërtet emocionues. Ai është një trajner i shkëlqyer me një prejardhje të madhe. Ne të gjithë mezi presim të punojmë me Xabi. Ai më dërgoi një mesazh dje. Do ta mbaj privat, por kryesisht foli rreth finales. Kam pasur një bisedë të shkurtër me të nëpërmjet mesazheve”, tha McFarlane.

Më tej, ai shtoi: “Nuk më habit fakti që klubi arriti ta merrte atë si trajner. Chelsea është një klub i madh dhe kemi vërtet disa nga lojtarët më të mirë në botë që e kanë treguar këtë gjë edhe pse ka qenë një sezon zhgënjyes. Një klub i madh dhe gjithmonë do të tërheqë lojtarë dhe menaxherë të nivelit të lartë.”

McFarlane ka shtuar se nuk ka menduar për të ardhmen e tij, nëse do të jetë ende pjesë e klubit londinez: “Nuk kam menduar për këtë. Kam ende dy ndeshje për të drejtuar dhe kaq shumë gjëra në lojë. Fokusi im është gjithmonë te ndeshja tjetër, seanca tjetër stërvitore.”

“Duhet të fitojmë dy ndeshjet e ardhshme për t’i dhënë vetes shansin më të mirë për të përfunduar sa më lart në ligë dhe për të fituar futbollin evropian. Ky është fokusi ynë i vetëm në kryerjen e punës sonë dhe në paraqitjen e duhur për të mposhtur Tottenham sot”, tha McFarlane.