Arrestohet 20-vjeçari i dyshuar për zjarrin masiv në fshatin Drizë të Fierit

Policia e Fierit ka vënë në pranga një 20-vjeçar, i dyshuar si autor i zjarrit masiv që përfshiu fshatin Drizë dhe zona përreth, duke shkaktuar dëme materiale dhe duke rrezikuar banesat e dhjetëra familjeve.

Sipas njoftimit zyrtar, në pranga ka rënë shtetasi me iniciale N. J., banues në Drizë. Hetimet paraprake kanë zbuluar se më 5 korrik 2026, ai ka ndezur zjarr në tokën në pronësi të babait të tij, me qëllim djegien e disa barishteve. Por flakët kanë dalë jashtë kontrollit dhe janë përhapur me shpejtësi në një sipërfaqe të gjerë.

Si pasojë e rrezikut të krijuar, policia ka evakuuar 12 familje, banesat e të cilave janë kërcënuar nga përhapja e flakëve.

Në operacionin për shuarjen e zjarrit u angazhuan forcat e Policisë, shërbimet zjarrfikëse, grupet e Forcës Kombëtare të Sigurisë (FKS) – Njësia Fier, si dhe helikopterë të Forcave të Armatosura. Falë ndërhyrjes së menjëhershme, zjarri u vendos nën kontroll dhe u shua pa shkaktuar humbje në jetë.

Policia e Fierit apelon për kujdes maksimal nga qytetarët dhe thekson se çdo veprim që mund të çojë në zjarrvënie do të përballet me ligjin. Gjithashtu, qytetarët ftohen të denoncojnë çdo rast paligjshmërie në numrin 112, duke iu garantuar anonimat dhe reagim të menjëhershëm.