Arrestohet në Brazil Ervin Mata, i shpallur në kërkim nga SPAK

Pas rreth tre vjetësh në arrati është arrestuar në Brazil shtetasi Ervin Mata, i shpallur në kërkim nga SPAK që në nëntor të 2023. Autoritetet akuzojnë se ai ishte pjesë e një grupi kriminal të përfshirë në trafik ndërkombëtar të kokainës, si dhe për pastrim parash dhe sigurimin e kushteve për vrasje.

Sipas TV Klan, hetimet e vitit 2023 u kryen në bashkëpunim me EUROJUST, EUROPOL dhe agjencitë ligjzbatuese të Belgjikës, Francës, Holandës, Gjermanisë, Brazilit dhe Kolumbisë. Në kuadër të operacionit ndërkombëtar të koduar “The Wanted” dhe përmes shkëmbimit në kohë reale midis Interpolit të Tiranës dhe Interpol Brasilias, në qytetin Ilha Bela u kap 39-vjeçari E.M., i cili dyshohet se përdorte dokumente angleze të falsifikuara. Gjykata e Posaçme e Shkallës së Parë për Korrupsionin dhe Krimin e Organizuar i kishte caktuar atij, në 2023, masën “arrest në burg” për trafikim të lëndëve narkotike dhe veprime nga organizata kriminale; ndër akuzat përmendet edhe koordinimi i trafikimit të 240 kg kokainë më datë 29.09.2020.

Interpol Tirana vazhdon bashkëpunimin me Interpol Brasilia për të finalizuar procedurat e ekstradimit drejt Shqipërisë, raporton TV Klan.