Axl Rose në zi për macen e tij Whiskey: Ishte një djalë, një vëlla dhe një mik

– Frontmeni i grupit amerikan “Guns N’ Roses”, Axl Rose, ka ndarë me ndjekësit e tij lajmin për humbjen e një prej maceve të tij të dashura, Whiskey Maranello Rose, e cila ngordhi më 25 gusht në moshën 16-vjeçare.

Këngëtari publikoi në rrjetet sociale një fotografi të Whiskey-t së bashku me një tjetër prej maceve të tij, duke e shoqëruar me një mesazh prekës.

“Një djalë, një vëlla, një mik”, shkroi Rose në kujtim të kafshës së tij, duke shprehur dhimbjen për humbjen e saj.

Whiskey ishte pjesë e familjes së Axl Rose që prej vitit 2010. Këngëtari është i njohur për lidhjen e tij të fortë me kafshët shtëpiake dhe më parë kishte përjetuar humbjen e një tjetër maceje, Dexter, e cila ngordhi në vitin 2021.

Rose vijon të ketë në familjen e tij macen Dijon, e cila gjithashtu është shfaqur ndër vite në postimet e këngëtarit në rrjetet sociale.

Lajmi për vdekjen e Whiskey-t ka marrë reagime të shumta nga fansat e Axl Rose, të cilët kanë shprehur ngushëllimet e tyre për këngëtarin.