Berati përkujton sot 82-vjetorin e Çlirimit

13 shtatori shënon 82-vjetorin e Çlirimit të qytetit të Beratit. Në këtë datë përkujtimore, qyteti i njohur për trashëgiminë e tij historike dhe kulturore kujton ngjarjet e vitit 1944 dhe kontributin e forcave partizane në luftën për çlirimin e vendit, gjatë Luftës së Dytë Botërore.

Kryeministri Edi Rama ndau një mesazh në përkujtim të kësaj dite, duke vënë në pah përmes fotove edhe bukurinë dhe trashëgiminë e qytetit të Beratit.

“Berati i një mbi një dritareve, pasuri e çmuar e UNESCO-s, në këtë 13 Shtator kujton 82-vjetorin e Çlirimit”, shkruan Rama.

Çlirimi i Beratit më 13 shtator 1944 konsiderohet një nga momentet e rëndësishme të luftës së Ushtrisë Nacionalçlirimtare. Pas kësaj date, luftimet vijuan edhe në qytete të tjera të Shqipërisë, duke i hapur rrugë çlirimit gradual të territorit të vendit.

Berati është pjesë e Listës së Trashëgimisë Botërore të UNESCO-s, ndërsa kombinimi i trashëgimisë historike, arkitekturës, gastronomisë dhe natyrës po e zgjeron ofertën turistike të qytetit.

Kalaja e Beratit mbetet një nga pikat kryesore të vizitës, ndërsa përtej qendrës historike turistët po orientohen edhe drejt zonave rurale, kantinave të verës dhe agroturizmit.