Berisha: Ekonomia është në gjendje katastrofike, kostoja e jetesës është rritur me 60 përqind

Kreu i Partisë Demokratike, Sali Berisha, deklaroi se në “katër vitet e fundit, kostoja e jetesës së shqiptarëve është rritur 60 përqind”.

“Gjendja ekonomike e shqiptarëve po rrokulliset me shpejtësi. Institucione serioze të pavarura dëshmojnë se katër vitet e fundit, kostoja e jetesës së shqiptarëve është rritur 60 përqind. Është rritja më e madhe pas Iranit, Haitit, të cilët dihet që janë në problematika, njëri në luftë dhe në diktaturë, tjetri në sundimin e bandave si Shqipëria. Çmimet rriten çmendurisht. Sot, Shqipëria është njëri nga tetë vendet me çmimin e naftës më të lartë në botë. Qeveria shqiptare kryen vetëm një detyrë, vjedhjen, vjedhjen, vjedhjen e fondeve publike. Treguesit janë katastrofikë. Vetëm pesë gjer në tetë përqind e projekteve, përfundojnë. Të tjerat avullojnë, grabiten”, tha Berisha, shkruan A2.

“Korrupsioni, vjedhja në tendera arrin në vit në 1.2 miliardë euro. Vjedhja në tendera tejkalon fondin e pensioneve të Shqipërisë. Vetëm në tendera. Shpalljet se Shqipëria investon 10 përqind të Prodhimit të Brendshëm janë një mashtrim i paskrupullt. Për të arritur në këtë shifër të pavërtetë, qeveritarët llogarisin tenderat e dështuar, e anuluar. Fakti është se investimet arrijnë gjithsej 4.9 përqind, arrijnë në shifrat më të ulëta në Evropë. Akoma më katastrofik është finalizimi i projekteve. Gjithsej pesë deri në 8 përqind. Do thoni ju, shtet i falimentuar. Shtet hajdut! Kompanitë nuk përfundojnë asgjë në afat sepse ndajnë paratë me qeveritarët. Në themel të të gjithë këtij, në pamje dështimi të madh, është vjedhja e madhe e fondeve nga qeveritarët. Ndaj dhe rënia katastrofale e transparencës në prokurime nga 80 pikë që ishte në vitet 2010-2012 nga Tender Europe, ka zbritur në 64 pikë në vitin 2026”, shtoi kreu demokrat.