Berisha: Integriteti i prokurimeve publike ka rënë me 14 pikë

Kreu i Partisë Demokratike, Sali Berisha, deklaroi sot në një konferencë për media se integriteti i prokurimeve publike në Shqipëri ka rënë me 14 pikë që nga periudha kur PD ishte në pushtet.

“Rama mashtroi hapur. Integriteti i prokurimeve publike ka rënë me 14 pikë që kur ne ishim në pushtet! Qeveria jonë mori çmim të dytë në botë nga OKB për transparencë në prokurime”, tha Berisha.

Kreu i PD shtoi se pretendimet e kryeministrit për përmirësime në sistemin e prokurimeve janë të pavërteta.

“Njeriu që në çdo fjali nxjerr një gënjeshtër është bërë barsoletë e vërtetë në Shqipëri, në Evropë dhe më gjerë”, u shpreh Berisha, duke i referuar shifrat dhe statistikat që, sipas tij, tregojnë të kundërtën.

Sipas tij, në vitet 2010-2012, integriteti i prokurimeve publike vlerësohej me 80%. Megjithatë, sipas Berishës, pas kësaj periudhe sistemi ka njohur një përkeqësim progresiv: integriteti ra në mesatare 70% dhe në vitin 2026 është vetëm 66%, duke shënuar një rënie dramatike prej 14 pikësh.

“Teknologjia e vitit 2026 është më e avancuar dhe lejon mundësi më të mëdha për transparencë. Përkundrazi, sistemi nuk njohu përmirësim, por përkeqësim progresiv”, theksoi Berisha, duke paralajmëruar se shkaqet do të shqyrtohen më tej.