Bizneset kundër Dhomës Ekonomike Kombëtare: Jo anëtarësimit të detyrueshëm

Projektligji për krijimin e Dhomës Ekonomike Kombëtare vijon të kundërshtohet nga organizatat e komunitetit të biznesit, të cilat vlerësojnë se ndryshimet e bëra në draftin e ripunuar nuk kanë adresuar shqetësimet kryesore.

Në një qëndrim të përbashkët, Dhoma Amerikane e Tregtise dhe 16 shoqata te tjera biznesi, kërkojnë rishikimin e modelit të anëtarësimit të detyrueshëm. Sipas tyre, çdo biznes me status aktiv do të bëhej automatikisht pjesë e Dhomës, ndërsa përfaqësimi i sipërmarrjes duhet të bazohet te zgjedhja dhe vullneti i vetë bizneseve.

Organizatat paralajmërojnë se një strukturë e krijuar me ligj nuk duhet të dobësojë apo të zëvendësojë shoqatat dhe dhomat ekzistuese, të cilat funksionojnë mbi bazën e anëtarësimit vullnetar. Një tjetër shqetësim lidhet me tarifën vjetore që do të paguajnë bizneset. Komuniteti i biznesit kërkon që ligji të përcaktojë qartë shërbimet që do të përfshihen në këtë tarifë dhe përfitimet konkrete për çdo anëtar. Shoqatat e bizneseve kërkojnë gjithashtu një analizë të plotë të sistemit aktual, kostove të reformës dhe alternativave të mundshme, përpara se të vendoset një detyrim financiar për sipërmarrjen.

Sipas tyre, duhet të jetë e qartë edhe ndarja e kompetencave mes Dhomës së re dhe institucioneve publike, veçanërisht Qendrës Kombëtare të Biznesit, për të shmangur procedurat paralele dhe kostot shtesë.