BM – 157 emigrantë shpëtohen pasi gomonia merr flakë dhe përmbyset në La Mansh

LONDËR, 4 gusht /ATSH-DPA/ – Një gomone me 157 emigrantë u përmbys në La Mansh pasi motori i saj mori flakë gjatë lundrimit drejt Britanisë së Madhe.

Të gjithë personat në bord u nxorën nga uji në një operacion të madh shpëtimi të koordinuar nga autoritetet franceze.

Në operacion morën pjesë anije franceze, dy mjete të Komandës Britanike për Sigurinë Kufitare (Border Security Command), si edhe një mjet i Institutit Mbretëror Kombëtar të Varkave të Shpëtimit (RNLI).

Sipas autoriteteve franceze, emigrantët po transportohen në portin e Boulogne-sur-Mer, ndërsa 54 prej tyre u morën në bord nga anijet britanike dhe u dërguan në Francë.

Ngjarja ndodh vetëm një ditë pasi partia britanike Reform UK prezantoi planin e saj të quajtur “Operation Fortress”, i cili parashikon përdorimin e Marinës Mbretërore për kthimin e emigrantëve në Francë ose Belgjikë.

Lideri i Reform UK, Nigel Farage, reagoi pas incidentit duke deklaruar se “duhet t’i japim fund kësaj situate”, duke shtuar se plani i partisë së tij “do të shpëtojë jetë”.

Kalimet e emigrantëve me gomone në Kanalin Anglez mbeten një nga çështjet më të debatueshme mes Britanisë së Madhe dhe Francës, ndërsa autoritetet vazhdojnë të përballen me një numër të lartë tentativash për të kaluar kufirin në mënyrë të paligjshme./ /Ad.Ab./ a.jor.