Bomba e Perez: Ofertë 150 milionë euro për një lojtar, goditje e stilit Cristiano Ronaldo

Vazhdon fushata elektorale te madrilenët. Sipërmarrësi spanjoll: Të martën vjen një yll i ri te Reali, ju konfirmoj se kemi blerë Dumfries.

Reali është në prag të zgjedhjeve për presidencën e tij. Numri 1 i “Los Blancos”, Florentino Perez, që për herë të parë ka përballë një sfidant, vazhdon me premtimet, duke iu përgjigjur rivalit, 37-vjeçarit Enrique Riquelme. Ky i fundit ka pohuar se në rast se fiton presidencën, do të blejë Haaland dhe Rodri.

Perez, gjatë një interviste të gjatë për “Horizonte”, ka konfirmuar 3 goditje në merkato: “Mund të flas për 3 blerje të sigurta: Mourinho, Konate dhe Dumfries”.

Më pas Perez ka bërë deklaratën bombastike: “Të martën do të bëj një ofertë të rëndësishme te një skuadër që luan në Champions League, për një lojtar të madh. Do të ishte transferimi më i shtrenjtë në historinë e klubit: të paktën 150 milionë euro. Nuk është Doku, nuk është Haaland, nuk është Kane. Është një sulmues dhe nuk luan në Premier League.

Është një galaktik totalisht. Por më parë duhet të flasim me klubin e tij. Nuk do të bëjmë atë që ka bërë ky zotëri… Do të bëjmë propozimin tonë të martën. Nuk bëhet fjalë për Olise. Është një lojtar sulmues, që vepron nga mesi i fushës e përpara. Është një lojtar i dimensioneve të Cristiano Ronaldo”.