Bregu: Qytetarët nuk pranojnë më të injorohen nga pushteti

Pedagogu Zylyftar Bregu komentoi në Euronews Albania protestat qytetare që po zhvillohen në vend, duke theksuar se emëruesi i përbashkët i pjesëmarrësve është ndjenja e mospërfilljes nga pushteti.

Sipas Bregut, qytetarët që janë bashkuar në protesta janë njerëz që ndihen përçmuar nga institucionet.”Unë mendoj që ata që kanë dalë aty janë njerëz që ndihen të pakonsideruar, të pavlerësuar, të përçmuar nga pushteti. Kjo është, mendoj unë, emëruesi i përbashkët i tyre”, u shpreh ai.

Duke folur për pretendimet se pas protestave mund të ketë grupe apo interesa të ndryshme, Bregu tha se nuk përjashton ekzistencën e rrymave apo ndikimeve të caktuara, por theksoi se kjo nuk zbeh motivimin e qytetarëve që marrin pjesë.

“Pavarësisht atyre qendrave që thonë disa që unë nuk i mohoj, mund të ketë shumë rryma, mund të ketë fraksione, mund të ketë shërbime që do të duan të përfitojnë nga kjo gjë. Por qytetarët që janë mbledhur aty, qytetarët e Tiranës, të rinjtë e Tiranës dhe të rinjtë që vijnë nga diaspora, unë nuk mund ta mendoj që ata zotërinj që kanë lënë punën në vendet e tyre të jenë blerë dhe të jenë shitur për të ardhur në Shqipëri”, tha Bregu.

Sipas pedagogut, protestat shprehin një frymë të re qytetare, veçanërisht te brezat e rinj. “Do të jetë Shqipëria e një qytetari, atij që ju e quani ‘Gjenerata Z’, që nuk e pranon injorimin nga pushteti”, deklaroi Bregu.Ai shtoi se një nga problemet kryesore të tranzicionit shqiptar ka qenë përjashtimi i qytetarëve nga proceset demokratike.

“Ajo që ka ndodhur këto 35 vjet është pikërisht kjo: qytetari është ndjerë i përjashtuar nga demokracia në Shqipëri”, përfundoi pedagogu i komunikimit, Zylyftar Bregu.