Britania investon 8.4 miliardë paund në flotën bërthamore

Mbretëria e Bashkuar ka njoftuar një investim prej 8.4 miliardë paundësh (9.8 miliardë euro) për fazën e ardhshme të programit të nëndetëseve bërthamore të klasës Dreadnought, në kuadër të forcimit të kapaciteteve të saj mbrojtëse.

Sipas qeverisë britanike, pjesa më e madhe e fondit, rreth 5.9 miliardë paund, do t’i akordohet kompanisë BAE Systems, ndërsa pjesa tjetër do të shpërndahet në zinxhirin e furnizimit të industrisë së mbrojtjes.

BAE Systems është përgjegjëse për ndërtimin e katër nëndetëseve me energji bërthamore të klasës Dreadnought, të cilat do të zëvendësojnë flotën aktuale dhe do të jenë pjesë e strategjisë së parandalimit bërthamor të Britanisë. Qeveria synon që nëndetësja e parë, HMS Dreadnought, të përfundojë provat detare dhe të hyjë në shërbim me Marinën Mbretërore në fillim të viteve 2030.

Autoritetet britanike theksuan se programi pritet të mbështesë rreth 47 mijë vende pune dhe programe praktikash për të rinjtë gjatë dekadës së ardhshme.

Sekretari i Mbrojtjes, Wes Streeting, deklaroi se investimi konfirmon angazhimin e qeverisë për zhvillimin e nëndetëseve të klasës Dreadnought dhe njëkohësisht për mbështetjen e industrisë britanike të mbrojtjes.

Në total, qeveria britanike ka planifikuar të ndajë mbi 63 miliardë paund gjatë katër viteve të ardhshme për modernizimin e mbrojtjes bërthamore. Fondet do të financojnë programin Dreadnought, si edhe zhvillimin e nëndetëseve të reja sulmuese në kuadër të aleancës ushtarake AUKUS me Australinë dhe Shtetet e Bashkuara