Chivu, i sinqertë: Kisha frikë shkarkimin, klubi më mbështeti! Championsi jo një obsesion

Cristian Chivu njoftoi indirekt rinovimin me Interin nëpërmjet një batute, që përshkruan punën e trajnerit, gjithmonë në shënjestër. “E kam kuptuar pse lojtarët bëjnë kontrata nga 5 vjet, kurse për ne vetëm 2. Trajneri është ai që paguan i pari për gjithçka.

E kam menduar se mund të shkarkohesha pas humbjeve kundër Udinese dhe Juventus, por klubi më ka mbështetur gjithmonë. A do të qëndroj tek Interi më shumë se Marotta, siç ka thënë presidenti? Nëse nuk humbas tri ndeshje radhazi, ndoshta …”, – është shprehur Chivu.

Në intervistën për “Gazzetta dello Sport”, trajneri rumun ka folur edhe për temën Champions League: “Me Bodo mund të bënim më mirë. Shumë detaje të vogla na çuan tek ai rezultat, është pjesë e procesit gjatë një sezoni të gjatë.

Flitet shumë për këtë kupë, por jam kundër disa obsesioneve. Historia jonë të imponon ambiciet, por duhet të pranojmë se ka skuadra që shpenzojnë gjysmë miliardi për të fituar Champions-in. Besoj se objektivi i parë është të kualifikohemi mes 8 të parave në grup”.