Çitaku: Thaçi, Veseli, Krasniqi e Selimi morën sot verdiktin e popullit

Deputetja e PDK-së, Vlora Çitaku, ka reaguar pas “Marshit për Liri” të mbajtur në Prishtinë në mbështetje të ish-krerëve të Ushtrisë Çlirimtare të Kosovës që po gjykohen në Hagë.

Çitaku ka shkruar se Prishtina “kurrë më e bukur nuk është dukur”, duke theksuar pjesëmarrjen e qytetarëve të të gjitha moshave.

“Të rinj e të moshuar. Gra e burra. Nëna e baballarë. Fëmijë që luftën e njohin vetëm nga rrëfimet e prindërve të tyre dhe njerëz që ende i bartin plagët e saj. Një popull i ngritur në këmbë. Si një. Me një zë. Me një histori. Me një porosi. Me një thirrje: LIRI!”, ka shkruar ajo.

Sipas Çitakut, Hashim Thaçi, Kadri Veseli, Jakup Krasniqi dhe Rexhep Selimi kanë marrë të shtunën “verdiktin e popullit të tyre”.

“Të pafajshëm!”, ka shkruar ajo.

Ajo ka thënë se qytetarët dolën në shesh për të kërkuar drejtësi dhe për të kundërshtuar, siç është shprehur ajo, rishkrimin e historisë së luftës së Kosovës.

“Sot Prishtina foli edhe për ata që nuk janë më. Për të rënët. Për dëshmorët. Për familjet që dhanë më të dashurit e tyre. Për një gjeneratë që rrezikoi gjithçka që ne sot të mund të jetojmë të lirë”, ka deklaruar Çitaku.

Deputetja e PDK-së e ka cilësuar marshin si një moment kur, sipas saj, Kosova kujtoi çmimin e lirisë.

“Sepse ka momente kur një popull duhet ta kujtojë kush është, nga ka ardhur dhe sa shumë ka kushtuar liria e tij. Sot ishte një prej atyre momenteve”, ka shkruar ajo.

Në fund, Çitaku u është drejtuar drejtpërdrejt Thaçit, Veselit, Krasniqit dhe Selimit, duke u shprehur se qytetarët i presin në Kosovë.

“Hashim, Kadri, Jakup, Rexhep, sot Kosova ishte në këmbë për ju. Sot e morët verdiktin e popullit tuaj: Të pafajshëm! Tash ju presim aty ku e keni vendin. Në Kosovën e lirë, për të cilën luftuat. Ju presim në shtëpi, çlirimtarë! LIRI!”, ka përfunduar Çitaku./Telegrafi/