Dede: Gjithçka mbetet e hapur, më vjen keq që djemtë nuk u shpërblyen me një gol

Trajneri i Egnatias, Nevil Dede ka folur për emisionin “Super Gol” në RTSH, pas barazimit pa gola 0-0 përballë Lillestromit, në ndeshjen e parë të Play Off-it të Europa League. Tekniku i rrogozhinasve ndjen keqardhje që loja e skuadrës nuk u shpërblye me një gol, por është optimist për ndeshjen e kthimit në Norvegji.

“Këta djem meritojnë komplimente, na kanë bërë krenarë. Djemtë u munduan shumë. Mendoj që ndeshja meriton komplimente. Normal që ne trajnerët gjejmë gjithmonë gjëra që nuk shkojnë.

Kemi gati 5 ditë që punojmë për këtë kundërshtar. Unë nuk i njoh cilësitë e të gjithë lojtarëve të Lillestrom, por me aq informacion sa unë kam marrë. Më vjen keq për djemtë që nuk u shpërblyen sot me një gol. Por mendoj se gjithçka mbetet e hapur. Ne jemi në lojë për gjithçka.

Në fund ajo që vlen, është që djemtë duhet të kuptojnë se jemi në arenën e të mëdhenjve dhe të sillemi si të tillë.

E kemi kapacitetin për këtë. Kemi shpërdoruar disa raste të thjeshta. Kundërshtari u mundua ta menaxhonte. Në fundin e ndeshjes mendoj se duhet të bënim më mirë”, ka thënë mes të tjerash Dede.