Dhuna barbare ndaj kreut të PD në Dajç, Ndreu: Policia të zbardhë ngjarjen – Tv Klan

Kryetari i Bashkisë së Lezhës Pjerin Ndreu ka reaguar sot në 11 maj, në lidhje me dhunën barbare të ushtruar ndaj ish-kreut të Partisë Demokratike në Dajç, Sokol Toma.

Ndreu shprehet se policia duhet të zbardhë ngjarjen dhe se autorët e dhunës ndaj një anëtari të komunitetit lezhjan duhet të japin llogari përpara drejtësisë.

Ndreu u ndal dhe tek raportimet mediatike, duke thënë se shprehje të tilla si “prerje veshi” vetëm sa shtojnë ankthin dhe disinformojnë opinionin publik.

Reagimi i kryetarit të Bashkisë së Lezhës Pjerin Ndreu:

Aktet e shëmtuara të dhunës janë sinjale negative që dëmtojnë dhe ndotin shoqërinë tonë. Dënoj me forcë ngjarjen e rëndë të ndodhur ndaj një anëtari të komunitetit lezhjan.

Kushdo që e ka menduar, organizuar apo kryer këtë akt duhet ta dijë se ligji, herët a vonë, të gjen dhe të vendos përpara përgjegjësisë. Edhe më të papranueshme janë banalitetet mediatike dhe spekulimet për “prerje veshi”, të cilat vetëm sa shtojnë ankthin dhe disinformojnë opinionin publik.

I kam kërkuar drejtuesve vendorë të policisë të bëjnë maksimumin për identifikimin e autorëve dhe vënien e tyre para drejtësisë sa më parë.

Lezha nuk mund dhe nuk do të pajtohet kurrë me dhunën, frikën dhe aktet kriminale që cenojnë sigurinë e qytetarëve tanë. Kushdo që përdor gjuhë të dhunshme, duhet të ndalë dhe të reflektojë pasi komunitetit lezhjan nuk ka asnjë lidhje me sjellje banale presioni dhe dhunë që herë pas here shfaqen!

Sokol Toma, ish-kryetar i Partisë Demokratike në njësinë administrative të Dajçit në Lezhë, është dhunuar nga persona të paidentifikuar mbrëmë në 11 maj.

Ngjarja ka ndodhur mbrëmjen e së shtunës në autostradën Mamurras–Laç, pranë fshatit Sanxhak në Kurbin. Disa persona të maskuar i kanë bllokuar rrugën dhe më pas e kanë goditur me mjete të forta, përpara se të largoheshin nga vendi i ngjarjes.

/tvklan.al