DZR: dobësi sistemike në Inspektoratin Shtetëror të Tregut — i mungojnë 165 inspektorë, digjitalizimi i dobët

Enti Shtetëror për Revizion (DZR) i Maqedonisë së Veriut ka konstatuar dobësi serioze sistemike në punën e Inspektoratit Shtetëror të Tregut (DPI), pasi ka kryer revizionin e raporteve financiare dhe revizionin e përputhshmërisë për vitin 2024. Për çështjet e përputhshmërisë, revizorët kanë shprehur opinion negativ (të pavolitshëm).

Sipas raportit, Inspektorati punon me numër përgjysmë të inspektorëve: i mungojnë plot 165 inspektorë, çka do të thotë se stafi i plotësuar është rreth gjysma e numrit të parashikuar me sistematizim. Gjendja është edhe më kritike në sektorin për sigurinë e produkteve jo-ushqimore, ku më 31 dhjetor 2024 ishin plotësuar vetëm 5 nga 14 pozicionet e planifikuara.

DZR konstaton gjithashtu se ende nuk janë krijuar regjistrat dhe sistemi informatik për menaxhimin e mbikëqyrjes inspektuese, ndërsa aplikacioni “E-inspektor” nuk është në përdorim të plotë. Nuk ekziston as një bazë elektronike unike dhe e plotë me metodologji të integruar për vlerësimin e rrezikut, gjë që e vështirëson planifikimin e inspektimeve me bazë rreziku. Po ashtu, dokumentet e krijuara dhe të dorëzuara gjatë kontrollit inspektues regjistrohen në mënyrë jo të plotë, ndërsa ndjekja e ndryshimeve ligjore dhe azhurnimi i listave të kontrollit nuk bëhen siç duhet.

Raporti shënon edhe disa gjetje pozitive. Shpenzimet laboratorike për analizat e produkteve janë paguar nga projekti EU4Business i GIZ (2022–2025) dhe nga Regio Trade (2025–2028), ndërsa me mbështetjen e CEFTA-s është krijuar një lidhje IT për shkëmbimin elektronik të të dhënave për produktet e pasigurta. Bazuar në analizat laboratorike të viteve 2022–2025, nga tregu janë tërhequr 40 produkte.

Revizioni thekson se plotësimi i kuadrit të inspektorëve, funksionalizimi i plotë i sistemit elektronik dhe përmirësimi i planifikimit me bazë rreziku janë kushtet kryesore për të garantuar mbrojtjen efektive të konsumatorëve dhe sigurinë e tregut.

Burimi: Nezavisen