Elon Musk: Shqetësimet e mia për sigurinë e IA-së datojnë më shumë se një dekadë më parë

NJU JORK, 14 shtator /ATSH -AA/ – Sipërmarrësi miliarder Elon Musk sot iu bashkua debatit mbi inteligjencën artificiale (IA), duke thënë se shqetësimet e tij për rreziqet e mundshme të kësaj teknologjie datojnë më shumë se një dekadë më parë.

“Kam menduar për sigurinë e inteligjencës artificiale shumë përpara vitit 2014”, tha ai në platformën amerikane të mediave sociale X, e cila është pjesë e sipërmarrjes së tij të IA-së SpaceXAI.

Musk iu referua përfshirjes së tij në librin e filozofit Nick Bostrom të vitit 2014, “Superinteligjenca: Rrugët, rreziqet, strategjitë”, duke thënë se kishte kontribuar në këtë vepër dhe se ishte falënderuar me emër në parathënien e saj.

Libri shqyrton pasojat e mundshme të tejkalimit të inteligjencës njerëzore nga IA, duke paralajmëruar se mbijetesa e njerëzimit mund të varet nga krijimi i mekanizmave të saktë të kontrollit përpara shfaqjes së sistemeve superinteligjente.

Musk iu referua një postimi të gushtit 2014, në të cilin ai rekomandonte librin dhe paralajmëronte se IA e avancuar ishte “potencialisht më e rrezikshme se armët bërthamore”.

Komentet e tij vijnë në një kohë kur drejtues të lartë të kompanive teknologjike bëjnë thirrje për ngadalësimin e zhvillimit të sistemeve më të avancuara të IA-së për shkak të shqetësimeve mbi sigurinë.

Gjatë fundjavës, shefi ekzekutiv i Anthropic, Dario Amodei propozoi që vlerësuesve të pavarur të sigurisë t’u jepet qasje në kompanitë e IA-së për të verifikuar praktikat e tyre të sigurisë, një qasje e mbështetur nga shefi ekzekutiv i OpenAI, Sam Altman dhe Musk.

Amodei tha të dielën për CBS se “ka rreziqe reale” lidhur me zhvillimin e IA-së.