FCC-ja amerikane voton më 29 tetor për ankandin e ri të spektrit: internet nga sateliti drejtpërdrejt në telefon

Komisioni Federal i Komunikimeve (FCC) njoftoi të mërkurën se do të votojë më 29 tetor nëse do ta çojë përpara një ankand të ri të spektrit wireless, me qëllim nxitjen e shërbimeve “direct-to-device” që sjellin internetin nga sateliti drejtpërdrejt në telefon, siç njofton Reuters.

Sipas planit, komisioni do të mbajë edhe një votim fillestar për modernizimin e rregullave për shërbimet “direct-to-device” dhe për finalizimin e rregullave që lejojnë operimin e dronëve në brezin celular 800 MHz. Teknologjia “direct-to-device” u lejon telefonave inteligjentë dhe pajisjeve të tjera të lidhen drejtpërdrejt me satelitët dhe po zhvillohet nga SpaceX-i dhe Leo i Amazon-it.

Kryetari i FCC-së, Brendan Carr, tha se propozimet synojnë t’i japin fund zonave pa sinjal celular, duke sjellë shërbimin nga konstelacionet satelitore të gjeneratës së re drejtpërdrejt në telefon. Carr ka thënë se një seri ankandesh spektrash në vitet e ardhshme mund të gjenerojnë mbi 100 miliardë dollarë. Propozimi parasheh ankandin e 25 megahercëve të spektrit kyç për operimet “direct-to-device” dhe vënien në dispozicion të 482 megahercëve shtesë për mbulim shtesë nga hapësira.

Në janar, FCC-ja miratoi kërkesën e SpaceX për të vendosur edhe 7.500 satelitë të tjerë të gjeneratës së dytë Starlink, duke e çuar totalin në 15.000. SpaceX bleu 65 megahercë spektër wireless nga EchoStar për 19.6 miliardë dollarë, përmes dy marrëveshjeve të shpallura vitin e kaluar, ndërsa komisioni të martën në mbrëmje miratoi planin e SpaceX për të përdorur spektrin e ri për të zgjeruar planet e “direct-to-device”.

Ambicia e SpaceX për një shërbim të plotë mobil shqetësoi investitorët e sektorit wireless amerikan, pasi kompania në gusht paraqiti planet që mund ta vënë Starlink-un përballë tre operatorëve kryesorë të telekomit amerikan. Javën e kaluar, AT&T, T-Mobile dhe Verizon emëruan veteranin e industrisë Paul Roth si drejtor ekzekutiv të përkohshëm të sipërmarrjes së tyre të përbashkët për mbulim mobil përmes satelitit.