FOKUS – EBA kërkon rrugë alternative për eksportet energjetike për të shmangur kërcënimin iranian

– Emiratet e Bashkuara Arabe po ndërtojnë dhe zgjerojnë rrugë alternative për eksportet e energjisë dhe tregtinë, në përpjekje për të mos lejuar që lufta mes Shteteve të Bashkuara dhe Iranit të paralizojë ekonominë e vendit, sipas Reuters.

Këshilltari i presidentit Anwar Gargash tha se eksportet energjetike të Emirateve të Bashkuara Arabe dhe aktiviteti tregtar nuk do të “mbahen peng” nga konflikti.

Lufta ka pasur ndikim të drejtpërdrejtë mbi shtetet arabe të Gjirit, përfshirë EBA-n pasi Irani ka lëshuar raketa drejt territorit të tyre dhe ka sulmuar cisterna nafte në Ngushticën e Hormuzit.

Për Abu Dabin, varësia nga kjo rrugë strategjike është kthyer në një rrezik të madh për sigurinë ekonomike dhe energjetike.

Emiratet e Bashkuara Arabe kanë nisur të rrisin kapacitetet e porteve përgjatë bregdetit lindor dhe po investojnë në tubacione, hekurudha dhe korridore të reja tregtare që mund të shmangin Hormuzin.

Synimi është krijimi i alternativave që do t’u mundësojnë eksporteve të naftës dhe mallrave të vazhdojnë edhe në rast se transporti përmes ngushticës ndërpritet.

Gargash pranoi se marrëdhëniet me Iranin mund të përmirësohen në të ardhmen, por paralajmëroi se rindërtimi i besimit pas sulmeve mund të kërkojë dekada.

Ai kritikoi gjithashtu shtetet arabe të Gjirit për mungesën e një përgjigjeje të koordinuar ndaj Iranit dhe tha se shqetësimet e përbashkëta nuk janë shndërruar në një strategji të unifikuar rajonale.

Në të njëjtin forum në Abu Dabi, zëdhënësi i Ministrisë së Jashtme të Katarit, Majed al-Ansari, tha se vendet e Gjirit nuk duhet të mbështeten vetëm te partneriteti strategjik me Shtetet e Bashkuara për sigurinë.

Sipas tij, prania e forcave ndërkombëtare është e rëndësishme, por vendet e rajonit duhet të zhvillojnë edhe kapacitete të pavarura për mbrojtjen e tyre.

Një tjetër çështje kryesore mbetet statusi i Ngushticës së Hormuzit, përmes së cilës para luftës kalonte rreth një e pesta e furnizimeve globale me energji.

Gargash tha se liria e lundrimit nuk duhet të jetë një lëshim politik apo një parim që negociohet nën presion.

Ndërkohë, lufta mes SHBA-së dhe Iranit, e nisur pas sulmeve amerikane dhe izraelite ndaj Iranit më 28 shkurt, mbetet e bllokuar, ndërsa përpjekjet për rikthimin e procesit të paqes kanë bërë pak përparim.