FOKUS – Nga 1 dhjetori Estonia mbyll plotësisht kufirin me Rusinë

TALIN, 15 nëntor /ATSH – ANSA/ – Estonia ka njoftuar mbylljen e plotë të të gjitha pikave të kalimit kufitar me Rusinë duke filluar nga 1 dhjetori, pas parandalimit në momentet e fundit të një tentative për zjarrvënie në një fabrikë prodhimi dronësh.

Sipas autoriteteve estoneze, tentativa e sabotimit dyshohet se ishte organizuar nga Shërbimi i Inteligjencës Ushtarake Ruse (GRU).

Lajmin e bëri të ditur ministri i Jashtëm i Estonisë, Margus Tsahkna, përmes një postimi në platformën X, ku deklaroi se të gjitha pikat kufitare mes dy vendeve do të mbyllen nga data 1 dhjetor.

Vendimi vjen në një klimë tensionesh të shtuara mes Estonisë dhe Rusisë, ndërsa autoritetet estoneze kanë rritur vigjilencën ndaj kërcënimeve të mundshme të sigurisë dhe akteve të sabotimit.