FOKUS – Studentët belgë në protesta kundër rritjes së tarifave të shkollimit dhe shkurtimeve në arsim

BRUKSEL, 13 nëntor /ATSH -AA/ – Studentët e Universitetit të Lirë të Brukselit (ULB) protestuan sot në kampusin Solbosch të universitetit kundër rritjes së tarifave të shkollimit, shkurtimeve të shpenzimeve për arsim dhe reformave qeveritare që prekin arsimin e lartë.

Duke mbajtur pankarta dhe duke brohoritur slogane, protestuesit kërkuan arsim falas dhe cilësor ndërsa kritikuan ato që i cilësuan si politika arsimore gjithnjë e më elitiste, raportoi gazeta “The Brussels Times”. Një nga pakënaqësitë kryesore ishte rritja prej rreth 43 për qind e tarifave vjetore të shkollimit.

Sipas të dhënave të Federatës Valoni-Bruksel, kjo rritje prek 58 për qind të studentëve në arsimin e lartë. Protestuesit kundërshtuan gjithashtu ndryshimet në dekretin “Paysage”, i cili rregullon organizimin e arsimit të lartë, si dhe shkurtimet e shpenzimeve për arsim në Federatën Valoni-Bruksel.

Protesta kishte në shënjestër edhe investimet ushtarake prej 34 miliardë eurosh që qeveria federale planifikon të bëjë deri në vitin 2034 ndërsa studentët vunë në kontrast shpenzimet ushtarake me financimin e arsimit.

Njëra nga hyrjet e kampusit ishte dekoruar me kamuflazh ushtarak dhe mbishkrimin “arsim elitist + luftë” ndërsa në një hyrje tjetër promovohej mesazhi “arsim falas dhe cilësor”. Demonstruesit u bënë thirrje studentëve dhe sindikatave të arsimit që t’i bashkohen protestës së planifikuar për 17 nëntor, në përputhje me Ditën Ndërkombëtare të Studentëve.

Ata shprehën mbështetje për aksionin e 20 nëntorit kundër shërbimit vullnetar ushtarak, të organizuar nga platforma “Service for Peace”.