Gazetarja: Rama përballë “fëmijëve politikë” të tij, kërkojnë zgjidhje për problemet e krijuara nën qeverisjen e tij

Duke folur për protestat e aktivistëve dhe qytetarëve në Tiranë, gazetarja Mirela Milori u shpreh se problematikat e ngritura në shesh po përpiqen të zbehen nga kryeministri, ndërsa sipas saj ato lidhen me shqetësime të krijuara gjatë viteve të qeverisjes së Partisë Socialiste.

Ajo tha se në protestë janë kryesisht përfaqësues të gjeneratës Z, të cilët, sipas saj, kur kryeministri Edi Rama ka ardhur në pushtet kanë qenë fëmijë dhe sot janë në moshë 20–30 vjeç.

Milori u shpreh se kërkesat dhe pakënaqësitë e shprehura në protestë lidhen drejtpërdrejt me qeverisjen aktuale, duke theksuar se përgjegjësia politike, sipas saj, bie mbi kryeministrin Edi Rama.

“Në protestë janë Gjenerata Z, të cilët kur Edi Rama ka ardhur në pushtet kanë qenë nga 5 deri në 15 vjeç, ndërsa sot janë 20 deri në 30 vjeç. Këta kanë përballë Edi Ramën politikisht, sepse janë fëmijët politikë të Edi Ramës, janë rritur nën pushtetin e tij dhe atij do t’i kërkojnë llogari: Edi Rama, kryeministër, 1-2-3-4, atij do t’i kërkojnë llogari, sepse nuk kanë punë me Berishën. Prandaj, këto të vërteta që po thuhen hapur nuk mbulohen dot as me Iranin, as me Greqinë që do të na minojë turizmin, as me Dritan Goxhajn, sepse nuk kanë asnjë peshë. Tani po hidhen versione të ndryshme, por të vërtetat që po thuhen hapur në këtë bulevard nuk zhduken dot. Ose do të shihen hapur këto të vërteta, sepse këta kanë një problem dhe kjo prapavijë e dyshimtë arrin t’i ngrejë ata njerëz në shesh. Kjo është prapë një autogol për Ramën dhe Berishën, sepse nuk i mbushin sheshet jo 26 ditë rresht, por as dy ditë rresht. Njerëzit që duan ta shohin thelbin duhet të ulen dhe të lënë emocionet mënjanë. Këta njerëz kanë probleme reale: kadastra, pallate pa hipotekë, shtëpi të blera me kursime dhe pa dokumente. Ka një sërë problematikash që janë krijuar në 14 vite dhe nuk zhbëhen duke thënë “jo Irani” apo “prapavija”, por duke u ulur për të folur dhe për t’i rregulluar.