Ghalibaf: Irani do të “luftojë dhe negociojë” — Hormuzi nuk hapet derisa SHBA-ja të plotësojë shtatë kushtet

Irani do të “luftojë dhe negociojë” njëkohësisht me Shtetet e Bashkuara, deklaroi sot kryenegociatori iranian Mohammad Bagher Ghalibaf, duke bërë të qartë se Ngushtica e Hormuzit do të mbetet e mbyllur derisa Uashingtoni të plotësojë shtatë kushtet e Teheranit, siç njofton Al Jazeera.

Ghalibaf, i cili është edhe kryetar i parlamentit iranian, tha se Uashingtoni ka bërë “disa propozime përmes një ndërmjetësi”, pasi Teherani paraqiti planin e tij shtatëditor për ri-hapjen e ngushticës strategjike. Por ai theksoi se Irani nuk është as “i ngazëllyer”, as “i frikësuar” nga veprimet amerikane. “Ne jemi të pranishëm në fushëbetejën ushtarake me gjithë fuqinë tonë dhe do t’i përballemi me surpriza të reja, dhe gjithashtu përdorim mjetet e diplomacisë për të vendosur epërsinë tonë në fushën ushtarake dhe për të imponuar të drejtat e popullit iranian”, shtoi ai.

“Ngushtica e Hormuzit nuk do të hapet derisa të plotësohen shtatë kushtet tona, të bazuara në Memorandumin e Islamabadit”, deklaroi Ghalibaf, duke shtuar se SHBA-ja duhet ta dijë se “epoka e humbjes së kohës dhe diktimit të kërkesave të njëanshme ka mbaruar” dhe se qëndrimi i Iranit mbetet “i qartë dhe i prerë”.

Kushtet e Teheranit, të përcjella muajin e kaluar përmes ndërmjetësve të Katarit, përfshijnë fundin e luftës në të gjitha frontet, lirimin e fondeve të ngrira iraniane, fundin e bllokadës detare amerikane ndaj porteve iraniane, fundin e ndërhyrjes së SHBA-së në punët e brendshme të Iranit, fundin e bashkëpunimit amerikan me armiqtë e Iranit dhe fundin e të gjitha sulmeve amerikane në territorin iranian.

Deklaratat e Ghalibaf-it vijnë ndërsa presidenti amerikan Donald Trump tha të shtunën se lufta mund të përfundojë “shumë shpejt, ndoshta menjëherë pas zgjedhjeve”, dhe ndërsa Pentagoni konfirmoi të premten se po dërgon grupin sulmues të aeroplanmbajtëses USS Theodore Roosevelt drejt ujërave rreth Iranit — një lëvizje që Teherani e lexon si presion ushtarak paralel me diplomacinë.