Gjendet kreu i Interpolit, por jep dorëheqjen, po hetohet në Kinë për korrupsion

Më herët ishte Interpoli që kishte njoftuar marrjën e dorëheqjes së tij nga presidenca e organizmit, gjatë së dielës, një dorëheqje që ishte me efekt të menjëhershëm.

Ndërkohë, bashkëshortja e Mengut, Grace u ka thënë reporterëve se burri i saj i kishte dërguar një mesazh me një thikë si “emoji”, ditën që ai ishte zhdukur. Ajo tha se çështja e bashkëshortit të saj duhej të ishte tashmë nën shqyrtimin e “ligjit ndërkombëtar dhe opinionit publik ndërkombëtar”.

Të hënën, pas disa ditë spekulimesh mbi vendndodhjen e Mengut, Komisioni Kombëtar i Mbikëqyrjes në Kinë njoftoi përmes një deklarate se ai është vënë nën hetim. Ky komision menaxhon rastet e korrupsionit, në të cilat janë të përfshirë punonjësit publikë.

Meng është personi i fundit i profilit të lartë që zhduket në Kinë, aty ku një numër i shumtë zyrtarësh qeveritarë, miliarderësh apo edhe personalitetesh janë zhdukur pa lënë gjurmë gjatë muajve të fundit.

Javën e kaluar, aktorja Fan Bingbing, e cila ishte zhdukur në Kinë prej korrikut, doli me një falje publike dhe rezultoi e gjobitur me 883 milionë juanë (129 mln dollarë) për evazion fiskal dhe shkelje të tjera.

Në një deklaratë të publikuar në “Twitter”, Interpoli njoftoi se kishte marrë dorëheqjen e parevokueshme të Meng, ndërkohë që bazuar në rregulloren e vet ka emëruar zv.presidentin Kim Jong-yang nga Koreja e Jugut si president në detyrë. Presidenti i ri, që do të zgjidhet vetëm për dy vitet e mbetura të mandatit të kinezit, pritet të dalë nga punimet e Asamblesë së Përgjithshme të Interpolit që do të mbahet në Dubai muajin e ardhshëm.