GJKKO refuzon tryezën e Ramës për pagat e magjistratëve: Presim vendimin e Kushtetueses

Edhe Gjykata e Posaçme kundër Korrupsionit dhe Krimit të Organizuar (GJKKO) nuk do të marrë pjesë në tryezën konsultative të thirrur nga kryeministri Edi Rama për pagat e magjistratëve.

Në një përgjigje zyrtare të datës 25 shtator 2026, GJKKO ka bërë me dije se nuk do të jetë pjesë e takimit, duke argumentuar se çështja është aktualisht në pritje të shqyrtimit dhe vendimmarrjes nga Gjykata Kushtetuese.

Vendimi për të mos marrë pjesë në tryezë vjen në të njëjtën linjë me qëndrimin e Gjykatës së Lartë, e cila gjithashtu ka refuzuar ftesën e Kryeministrisë, me argumentin se ligji për pagat e magjistratëve është tashmë objekt i shqyrtimit kushtetues.

Kështu, tryeza e thirrur nga Rama për diskutimin e formulës së re të pagave për magjistratët zhvillohet në një situatë ku dy prej institucioneve kryesore të drejtësisë kanë zgjedhur të mos marrin pjesë, duke iu referuar procesit në Gjykatën Kushtetuese.