Gjon Mili Video Art Festival mbyll me sukses ditën e dytë në New York
Publiku ndoqi një program të pasur me video art dhe filma të shkurtër nga gjashtë vende të ndryshme, ndërsa dokumentari kushtuar fotografit legjendar të Beatles, Dežo Hoffmann, u shndërrua në një nga momentet më të veçanta të mbrëmjes
NEW YORK – Dita e dytë e Gjon Mili Video Art Festival u zhvillua të dielën, më 28 qershor, në Producers Club Theaters në Manhattan, duke mbledhur artistë, kineastë dhe dashamirës të artit bashkëkohor në një program të larmishëm me video art, filma të shkurtër dhe dokumentar.
Mbrëmja nisi në Sonnet Theater me veprën “MicroMacro (Motorized vs Handheld)” të artistes amerikane Mona Kasra, e cila u pasua nga video arti “Money or Your Life” i autores Agnès Roux nga Monako.
Publiku ndoqi gjithashtu filmin e shkurtër “Dear Kevin” nga Kate Ferguson (SHBA), filmin italian “Né una né due”me regji të Lucia Catalini, filmin e animuar “Dizzy Cavalry” të kanadezit Patrick Doyon, veprën “Calling From Work” të artistit Karel van Laere nga Tajvani, si dhe “Phantom Dance” të Wheeler Winston Dixon (SHBA).
Kulmi i mbrëmjes ishte shfaqja e dokumentarit “Dežo Hoffmann – Photographer of the Beatles”, realizuar nga Laura Sivakova-Passova dhe Patrik Lancaric. Dokumentari solli për publikun jetën dhe veprën e fotografit sllovak Dežo Hoffmann, autor i disa prej imazheve më të njohura të grupit legjendar The Beatles, duke evidentuar rolin e tij në dokumentimin vizual të një epoke që ndryshoi historinë e muzikës moderne.
Pas përfundimit të projeksioneve, artistët dhe të ftuarit u mblodhën në Producers Club Bar, ku u zhvillua festa përmbyllëse e ditës së dytë. Takimet mes autorëve dhe publikut krijuan një atmosferë të ngrohtë diskutimesh dhe shkëmbimi idesh, duke konfirmuar edhe një herë karakterin ndërkombëtar dhe frymën bashkëpunuese që e dallon Gjon Mili Video Art Festival.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.