Gjykata ruse konfiskon 123 pasuri të paluajtshme, u përkisnin Dëshmitarëve të Jehovait

Një gjykatë në kryeqytetin rus ka konfiskuar 123 pasuri të paluajtshme që u përkisnin Dëshmitarëve të Jehovait dhe ia ka transferuar ato shtetit rus. Kështu ka njoftuar të premten shërbimi gjyqësor i Moskës.

Ajo tha se asetet pronësore ishin regjistruar më parë si pronë e degës suedeze të Dëshmitarëve të Jehovait dhe përfshinin 63 prona me një sipërfaqe totale prej mbi 11,000 metrash katrorë dhe 60 parcela toke me një sipërfaqe totale prej 5.6 hektarësh të vendosura në të gjithë vendin.

Një gjykatë ruse i ndaloi Dëshmitarët e Jehovait si një “organizatë ekstremiste” në vitin 2017, një veprim që Gjykata Evropiane e të Drejtave të Njeriut vendosi në vitin 2022 se ishte në vetvete i paligjshëm.

Shumë Dëshmitarë të Jehovait në Rusi që atëherë janë burgosur pasi janë dënuar për “aktivitet ekstremist”.