HAPËSIRË – SpaceX lëshon raketën gjigante Starship në misionin e parë drejt orbitës së Tokës

NJU TEKSAS, 28 shtator /ATSH – AA/ – Kompania amerikane e hapësirës ajrore SpaceX ka lëshuar raketën e saj gjigante Starship nga objekti i kompanisë në Teksas, duke shënuar misionin e parë operacional të mjetit për vendosjen e satelitëve në orbitën e Tokës.

Lëshimi nga objekti Starbase i kompanisë në jug të Teksasit ishte fluturimi i 14-të i sistemit Starship, por i pari që synonte të arrinte orbitën, pasi 13 fluturimet e mëparshme ndoqën trajektore suborbitale.

Misioni mbart 26 satelitë të gjeneratës së re Starlink Version 3, të cilët SpaceX planifikon t’i vendosë në orbitë gjatë fluturimit. Satelitët janë projektuar për të ofruar kapacitet më të madh për Starlink, shërbimin e internetit satelitor të kompanisë.

Starship është raketa më e madhe e zhvilluar nga SpaceX dhe është projektuar të jetë plotësisht e ripërdorshme. Mjeti përbëhet nga një përforcues i fazës së parë, i quajtur Super Heavy dhe një anije kozmike të fazës së sipërme, të quajtur Starship.

SpaceX po zhvillon këtë sistem për të transportuar satelitë, ngarkesa dhe përfundimish njerëz në orbitën e Tokës, si dhe për të mbështetur misionet e ardhshme drejt Hënës dhe Marsit.

Anija kozmike pritet të rrotullohet rreth Tokës rreth gjashtë herë gjatë një fluturimi prej afro 10 orësh, përpara se të ndezë një motor për të dalë nga orbita dhe të përfundojë me ulje në Oqeanin Paqësor, në perëndim të Kilit.

Kompania ka deklaruar se Starship do të jetë i nevojshëm për lëshimin e satelitëve më të mëdhenj Starlink, të cilët synojnë të rrisin kapacitetin e rrjetit të saj në rritje të internetit satelitor.

Fluturimi përfaqëson gjithashtu një test të rëndësishëm të aftësisë së Starship për të kaluar nga fluturimet e përsëritura suborbitale të testimit drejt misioneve të rregullta orbitale.

SpaceX, e themeluar nga miliarderi Elon Musk, planifikon të përdorë Starship për misionet e ardhshme në hapësirën e thellë, përfshirë programin Artemis të NASA-s, që synon rikthimin e astronautëve në Hënë, si dhe fluturimet e ardhshme me ekuipazh drejt Marsit.