Harta territoriale, Basha: Tortë e ndarjes elektorale, e kundërshtojmë me forcë

Kreu i Partisë Demokratike, Lulzim Basha është shprehur sot kundër vendimit të Gjykatës Kushtetuese për të lënë në fuqi ndarjen e re territoriale. Basha tha se kjo nuk është hartë, por një tortë për ndarje elektorale, e cila u bë pa konsensus e gjithëpërfshirje.

‘Harta e re territoriale u miratua pa konsensusin e opozitës, është kundër frymës së bashkëpunimit dhe gjithëpërfshirës, kundër vullnetit të qytetarëve, u ndërtua në kundërshtim me kriteret e rekomanduara nga institucionet ndërkombëtare. Kjo nuk është hartë, por tortë për ndarjen elektorale.

Më tej Basha tha se kjo hartë përfaqëson pazaret e turpshme të dyshes Rama-Meta dhe është e papranueshme. Ai shtoi se PD-ja do qëndrojë në krah të qytetarëve dhe do marrë të gjitha hapat e nevojshme për të çuar në vend vullnetin e sovranit.

“Do marrim hapat e nevojshëm politik për të rivendosur sovranitetin e qytetarëve, duke i kujtuar oligarkëve se pronarë të këtij vendi janë qytetarët. 70 mijë firma janë depozituar sot për referendume lokale”, tha Basha.

Këto deklarata, kreu i opozitës i bëri në përfundim të takimit me Drejtorin e Departamentit Amerikan të Shtetit për Evropën Jugore dhe Qendrore, Thomas K. Yazdgerdi.