Hoxha takim me Komisioneren Kos në Dublin: Shqipëria e vendosur për të ruajtur ritmin e negociatave të anëtarësimit në BE

Ministri për Evropën dhe Punët e Jashtme, Ferit Hoxha, zhvilloi një takim me Komisioneren e BE-së për Zgjerimin, Marta Kos, në margjinat e Këshillit të Çështjeve të Përgjithshme që po mbahet në Dublin.

“Kënaqësi të takohem dhe të bisedoj me Komisioneren e BE-së për Zgjerimin, Marta Kos, në margjinat e Këshillit të Çështjeve të Përgjithshme, që zhvillohet gjatë këtyre dy ditëve në Dublin. Nuk do të humbasim kurrë asnjë shans për të qenë të pranishëm kudo që flitet për zgjerimin, për të paraqitur modelin e Shqipërisë; dhe kudo që zgjerimi është në axhendë, Marta Kos është aty për ta çuar procesin përpara”, u shpreh Hoxha në një postim në X.

Gjatë takimit, u shkëmbyen mendime mbi dinamikën aktuale të procesit të anëtarësimit, perspektivat e tij dhe rëndësinë e ruajtjes së ritmit dhe momentumit të negociatave.

“Për Shqipërinë, objektivi mbetet i qartë: të ecim përpara me vendosmëri dhe të mbyllim sa më shumë kapituj negociues të jetë e mundur këtë vit, duke vazhduar të zbatojmë reformat dhe angazhimet. Ne mbetemi plotësisht të përqendruar në punën përpara dhe të vendosur për të ruajtur ritmin e negociatave”, theksoi ministri.

Ai nënvizoi se zgjerimi ka të bëjë me “meritën, momentumin dhe rezultatin”, duke shtuar se “Shqipëria është gati për të treja”.

Takimi në Dublin u cilësua si një mundësi e rëndësishme për të riafirmuar angazhimin e Shqipërisë në procesin e integrimit evropian dhe për të theksuar vendosmërinë për të ruajtur ritmin e negociatave të anëtarësimit.

📍Dublin — A pleasure to meet and catch up with European Commissioner for Enlargement, Marta Kos, in the margins of the General Affairs Council, taking place during these two days in #Dublin.

We will never miss a chance to be present wherever there is talk about enlargement to… pic.twitter.com/8pxl4a1kvm

— Ferit Hoxha🇦🇱 (@HoxhaFer) September 3, 2026