Hoxha takon raporterin për Shqipërinë në PE: Mbështetje për progresin e vendit drejt BE-së

Ministri i Jashtëm, Ferit Hoxha, ka zhvilluar një takim në Bruksel me raportuesin për Shqipërinë në Parlamenti Evropian, Andreas Schieder.

Hoxha ka theksuar se në fokus të takimit ka qenë ecuria e procesit të integrimit europian të vendit.

Gjatë takimit, ministri shkruan se vlerësoi rezolutën e fundit të miratuar në Komisionin për Punët e Jashtme duke e cilësuar atë si një mesazh inkurajues për rrugën e Shqipërisë drejt anëtarësimit në Bashkimin Evropian.

Postimi i Ministrit Ferit Hoxha në X:

Gjatë qëndrimit tim në Bruksel, pata kënaqësinë të takohem me Andreas Schieder, raportues për Shqipërinë në Parlamentin Evropian.

E falënderova ngrohtësisht për punën e tij të shkëlqyer dhe angazhimin e vazhdueshëm në lidhje me Rezolutën e fundit për Shqipërinë, të miratuar nga Komisioni për Punët e Jashtme në Parlamentin Europian (AFET), e cila përcjell një mesazh të fortë dhe inkurajues në mbështetje të rrugës sonë drejt anëtarësimit evropian.

Shkëmbyem mendime mbi ecurinë e procesit të negociatave të Shqipërisë me BE-në, rëndësinë e ruajtjes së ritmit aktual të reformave, si dhe objektivin tonë të përbashkët për të avancuar të ardhmen evropiane të Shqipërisë përmes një procesi të besueshëm, të bazuar në meritë dhe të orientuar drejt së ardhmes.

Shqipëria e vlerëson shumë rolin e rëndësishëm dhe mbështetjen e vazhdueshme të europarlamentarëve dhe të gjithë miqve të zgjerimit, të cilët besojnë në një Evropë më të fortë, më të bashkuar dhe të orientuar drejt së ardhmes.