I jepet lamtumira aktorit Birçe Hasko

Familjarët, të afërmit, miqtë, bashkëpunëtorët dhe personalitete të artit i dhanë lamtumirën e fundit aktorit të njohur të kinematografisë shqiptare, Birçe Hasko, i cili u nda nga jeta në moshën 84-vjeçare.

Për mjeshtrin që u jepte roleve të tij një dimension të ri karakterit dhe situatave, mes emocionesh folën miqtë dhe bashkëpunëtorët, të cilët e konsiderojnë Haskon si një ikonë të pazëvendësueshme të artit dhe kinemasë.

Birçe Hasko do të mbahet mend për dhjetëra role të realizuara mjeshtërisht prej tij, tek të cilat solli karakterin popullor të jugut, duke e bërë të paharrueshëm për publikun shqiptar.

Birçe Hasko njihej për natyrën e veçantë interpretuese, ku elementët komikë dhe karakteret i kthente në pjesë të stilit të tij artistik, duke krijuar një lojë origjinale dhe të vështirë për t’u përsëritur.

Më 13 nëntor 1989 iu dha titulli “Artist i Merituar”, ndërsa në vitin 1995 mori titullin “Profesor”, dhe më vonë u nderua edhe me titullin “Mjeshtër i Madh”. Birçe Hasko do të prehet në banesën e fundit në vendlindje, në Dukat të Vlorës.

Klan News

/tvklan.al