Ish-efektivi Novruz Cenalia rivarroset në Varrezat e Dëshmorëve, Lamallari: Uniformën e pa si mision

Në Varrezat e Dëshmorëve në Tiranë u zhvillua këtë të shtunë ceremonia e rivarrimit të Dëshmorit të Atdheut, Novruz Cenalia, efektivit të Policisë së Shtetit që u vra dy vite më parë në Fier.

Në ceremoni morën pjesë Ministri i Punëve të Brendshme, Besfort Lamallari, drejtori i Përgjithshëm i Policisë së Shtetit, Skënder Hita, familjarë të të ndjerit, efektivë policie dhe përfaqësues të institucioneve shtetërore.

Në fjalën e tij, ministri Lamallari vlerësoi figurën dhe sakrificën e Novruz Cenalisë, duke theksuar se ceremonia nuk ishte vetëm një akt shtetëror, por edhe një moment nderimi për një efektiv që, sipas tij, e konsideroi uniformën si mision në shërbim të qytetarëve dhe të atdheut.

“Policia e Shtetit mban në historinë dhe kujtesën e saj edhe një dëshmor më shumë. Emri i Novruz Cenalisë do të qëndrojë përgjithmonë mes atyre burrave dhe grave që uniformën nuk e panë si privilegj, por si mision në shërbim të qytetarëve dhe të atdheut”, deklaroi Lamallari.

Ministri theksoi se vrasja e efektivit përbën një goditje ndaj autoritetit të shtetit dhe besimit te ligji, ndërsa shtoi se sakrifica e tij forcon vendosmërinë e institucioneve për luftën kundër krimit.

“Humbja e Novruz Cenalisë është një dhimbje e madhe, por ajo nuk e dobëson misionin tonë; përkundrazi, e bën edhe më të fortë vendosmërinë për të luftuar krimin dhe për të mbrojtur rendin e sigurinë publike”, u shpreh ai.

Lamallari e cilësoi shpalljen “Dëshmor i Atdheut” për Novruz Cenalinë si një akt drejtësie morale dhe historike, duke nënvizuar se Shqipëria e vendos atë në panteonin e burrave që dhanë jetën për vendin.

Gjatë ceremonisë, ministri kërkoi gjithashtu që drejtësia të shkojë deri në fund për autorët e ngjarjes kriminale.

“Drejtësia penale për Novruzin nuk është vetëm një detyrim ligjor; është një detyrim moral ndaj sakrificës së tij dhe ndaj çdo punonjësi policie që përballet çdo ditë me rrezikun për të mbrojtur qytetarët. Një shtet që nderon dëshmorët e tij, duhet të garantojë se krimi nuk do të triumfojë kurrë mbi ligjin”, deklaroi ai.

Në përfundim, Lamallari u shpreh se kujtimi i Novruz Cenalisë do të mbetet i paharruar për Policinë e Shtetit dhe për gjithë Shqipërinë.

“Në këtë vend të shenjtë, pranë dëshmorëve të kombit, prehet sot edhe një bir i denjë i Shqipërisë. Një njeri që nuk kërkoi lavdi, por bëri detyrën deri në frymën e fundit”, përfundoi ministri.