Ibrahimović në Strasburg nga nesër, Mali i Zi merr kryesimin e Komitetit të Ministrave të Këshillit të Evropës

Zëvendëskryeministri dhe ministri i Jashtëm i Malit të Zi, Ervin Ibrahimović, do të marrë pjesë në takimin e Komitetit të Ministrave të Këshillit të Evropës (KE) me rastin e marrjes së kryesimit të këtij komiteti nga Mali i Zi, siç njofton Vijesti, duke cituar Ministrinë e Punëve të Jashtme. Takimi mbahet në Strasburg gjatë dy ditëve të ardhshme.

Mali i Zi, nga nëntori i këtij viti deri në maj të vitit të ardhshëm, do të kryesojë për herë të parë që nga pranimi në Këshillin e Evropës Komitetin e Ministrave, organin kryesor vendimmarrës të Organizatës, dhe kryesimin gjashtëmujor do ta marrë nga Monakoja. Kryesimi gjashtëmujor i Malit të Zi fillon më 10 nëntor, kur e merr detyrën nga Monakoja, dhe përfundon në maj të vitit të ardhshëm me një sesion ministror ku Mali i Zi do të presë rreth 60 delegacione, përfshirë përfaqësues të 46 shteteve anëtare të KE-së, shteteve vëzhguese dhe udhëheqjes së Organizatës.

Ibrahimović do të paraqesë prioritetet e kryesimit malazez, ndërsa para tij, ministrja e Jashtme e Monakosë, Isabelle Berro-Amadei, do të paraqesë rezultatet e kryesimit të vendit të saj. Pas dorëzimit, para selisë së KE-së do të mbahet ceremonia e ngritjes së flamurit, me sekretarin e përgjithshëm të Organizatës Alain Berset, Ibrahimovićin dhe Berro-Amadein.

Programi parashikon edhe paraqitjen e një tramvaji të zbukuruar me ngjyrat e Malit të Zi në stacionin Droits de l’Homme në Strasburg, dhe më pas flamuri malazez do të ngrihet edhe në Sheshin e Republikës në Strasburg. Kryesimi mbështetet në tri vlera: dialogu, solidariteti dhe qëndrueshmëria.

Mali i Zi u bë anëtar i plotë i Këshillit të Evropës më 11 maj 2007. KE-ja, me seli në Strasburg, u themelua në vitin 1949 dhe mbledh 46 shtete anëtare, ndërsa Komiteti i Ministrave, ndër të tjera, mbikëqyr zbatimin e aktgjykimeve të Gjykatës Evropiane për të Drejtat e Njeriut. Kryesimi ndërrohet çdo gjashtë muaj, ndaj Mali i Zi do ta mbajë këtë funksion deri më 12 maj të vitit të ardhshëm.