Izraeli dëshiron të eksportojë gaz në Evropë përmes Italisë

Netanyahu ka nisur vizitën e tij treditore në Romë, ku do të takohet me liderët politikë dhe biznesorë.

Në një deklaratë të shkurtër pas takimit me Melonin, Netanyahu nuk përmendi protestat masive që po mbahen në Izrael për shkak të reformave të prezantuara nga Qeveria e tij apo për njoftimin e papritur të Arabisë Saudite se ka rivendosur raportet diplomatike me Iranin.

“Italia ka thënë se dëshiron të bëhet qendër për furnizim të Evropës me energji. Ne kemi të njëjtin mendim dhe ne kemi rezerva të gazit që tani po i eksportojmë dhe do të dëshironim që të kishim më shumë eksporte të gazit në Evropë përmes Italisë”, tha ai.

Izraeli ka nënshkruar një marrëveshje nëntorin e kaluar me kompanitë Eni dhe TotalEnergies, që mundëson që kompanitë e energjisë të nisin eksplorimin për gaz natyror brenda kornizës së marrëveshjes për kufijtë detar me Libanin.

“Ka një përfshirje të Eni në projektet tona të gazit, por mendoj se mund të transportojmë më shumë”, tha ai, duke shtuar se ministrat italianë dhe izraelitë do të takohen në Izrael në muajt në vazhdim për bisedime dypalëshe.

Para vizitës së tij në Romë, Netanyahu tha në një intervistë për një media izraelite se do t’i kërkonte Melonit që ta njohë Jerusalemin si kryeqytet të Izraelit. Por, kjo çështje nuk është përmendur në Romë nga lideri izraelit, e as nga kryeministrja italiane.