Janevska: Asnjë mësues me kontratë të pacaktuar nuk humbi punën pas bashkimit të 450 klasave — fëmijët në shkollë nga ora 8:00 deri në 16:30

Ministrja e Arsimit dhe Shkencës, Vesna Janevska, deklaroi se asnjë mësues me kontratë të pacaktuar nuk ka humbur vendin e punës pas bashkimit (fuzionit) të rreth 450 klasave në arsimin fillor dhe të mesëm. Sipas saj, stafi i tepërt do të absorbohet përmes futjes së qëndrimit gjithëditor të nxënësve në shkolla në të gjithë vendin.

Plani është që nxënësit të qëndrojnë në shkollë nga ora 8:00 deri në 16:30. Përveç orëve të rregullta mësimore, do të ketë aktivitete të lira e interaktive, seksione dhe kohë për kryerjen e detyrave të shtëpisë. “Qëndrimi në shkollë nuk do të thotë vetëm mësim. Atje fëmijët mund të mësojnë gjuhë të huaja, balet apo sport, dhe kur të kthehen në shtëpi nuk do të kenë detyrime shtesë apo çanta të rënda, por do t’i përkushtohen plotësisht familjes. Studimet botërore tregojnë qartë se fëmijët që kalojnë më shumë kohë në mjedisin shkollor arrijnë rezultate dukshëm më të mira”, tha ministrja në intervistën për 4TV.

Lidhur me sfidat infrastrukturore dhe zbatimin e mësimit me një ndërrim, Janevska theksoi se mbi gjysma e shkollave në vend tashmë punojnë me një ndërrim (583 shkolla fillore dhe 37 shkolla të mesme). Pika më kritike mbetet Shkupi për shkak të migrimeve të vazhdueshme, por ministria tashmë punon për ndërtimin e klasave të reja dhe zgjerimin e kapaciteteve.

Ajo shtoi se në intervistë foli edhe për trendet pozitive: 75% e nxënësve që mbarojnë klasën e nëntë po zgjedhin arsimin e mesëm profesional, dhe ka indikacione se vala e shpërnguljes është zvogëluar. Për suksesin në arsim, tha ajo, nevojitet kontinuitet dhe jo ndryshime të shpeshta politikash me çdo qeveri të re, në mënyrë që të mund të nxirret të paktën një gjeneratë e plotë dhe të vlerësohen rezultatet reale të reformave.

Burimi: 4NEWS