Jonathan Majors rikthehet në ekran: filmi aksion “Run Hide Fight: Infidels” debuton në streaming

Jonathan Majors është rikthyer zyrtarisht në ekran. Filmi i tij i ri aksion, “Run Hide Fight: Infidels”, debutoi më 16 shtator 2026 në platformën streaming Daily Wire+, duke shënuar publikimin e parë kinematografik të aktorit që prej vitit 2023, kur u përjashtua nga disa projekte të Marvel pas dënimit për sulm dhe ngacmim ndaj ish-partneres së tij.

Filmi, me regji të Kyle Rankin, është një vazhdim i pavarur i “Run Hide Fight” (2020). Majors luan kapitenin Clayton Saunders, një ish-kapiten i forcave speciale Delta, i cili bashkohet me studentë dhe një roje sigurie për të mbrojtur një kolegj nga një sulm terrorist.

Rikthimi i 37-vjeçarit nuk ka kaluar pa polemika. Zgjedhja e Majors për rolin kryesor dhe trajtimi i temës së terrorizmit islamik në film kanë nxitur reagime të ashpra; teaser-i i parë, që përdorte pamje reale lajmesh nga sulme terroriste, u përshkrua nga shumë shikues si islamofobik.

Edhe xhirimet u shoqëruan me incidente: në prill 2026, Majors dhe bashkë-ylli i tij JC Kilcoyne ranë nga një dritare rreth dy metra lartësi, çka bëri që disa anëtarë të ekipit të braktisnin xhirimet në shenjë proteste për mungesën e sigurisë në punë. Sindikata e punëtorëve të skenës IATSE shpalli më pas grevë kundër produksionit. Producenti Dallas Sonnier iu përgjigj kritikave me tone të ashpra, duke deklaruar për Deadline se “e gjithë industria është në rënie të lirë për shkak të grevave”.

Para skandalit, Majors konsiderohej një nga yjet në ngjitje të Hollywood-it, i njohur për rolin e Kang Pushtuesit në “Ant-Man and the Wasp: Quantumania”. Mbetet për t’u parë nëse “Run Hide Fight: Infidels” do të shënojë fillimin e një kapitulli të ri në karrierën e tij apo do të mbetet një episod i izoluar.

Burimi: ComingSoon.net