Kallëzim penal për policin e trafikut në Tetovë: shoferët me 154 dhe 151 km/orë i la me paralajmërim dhe gjobë 45 euro në vend të 300 eurove

Një polic i stacionit për siguri në trafikun rrugor në Tetovë do të përballet me kallëzim penal, pasi, siç njofton Centar.mk duke iu referuar Ministrisë së Punëve të Brendshme, Departamenti për kontroll të brendshëm, hetime kriminalistike dhe standarde profesionale pranë MPB-së e dorëzoi kallëzimin në Prokurorinë Themelore Publike për ndjekje të krimit të organizuar dhe korrupsionit — në Departamentin e specializuar për ndjekje të veprave penale të kryera nga persona me autorizime policore dhe pjesëtarë të policisë së burgjeve — nën dyshimin për veprat penale “keqpërdorim i pozitës zyrtare dhe autorizimit” dhe “punë e pakujdesshme në shërbim”.

Sipas raportimit të Centar.mk, polici i kallëzuar veprat i ka kryer më 2 shkurt 2025, duke mos vepruar në përputhje me autorizimet dhe dispozitat ligjore. Një polic tjetër kishte matur me radar shpejtësinë e dy automjeteve — 154 km/orë dhe 151 km/orë — në një pjesë rruge ku shpejtësia e lejuar është 100 km/orë, dhe e kishte njoftuar kolegun e tij që t’i ndalonte automjetet.

Pasi i ndaloi automjetet dhe identifikoi shoferët, polici, siç njofton Centar.mk, njërin shofer e la vetëm me një paralajmërim me shkrim për kundërvajtjen e kryer, ndërsa tjetrit i lëshoi një urdhër pagese kundërvajtëse me procesverbal me gjobë prej 45 eurosh — në vend që në të dy rastet t’u lëshonte urdhra pagese me gjobë prej 300 eurosh në kundërvlerë denarësh, siç parashikon Ligji për siguri në komunikacionin rrugor.

Me mosveprimin në përputhje me detyrën zyrtare, sipas MPB-së, polici u ka mundësuar kryerësve të kundërvajtjeve të mos sanksionohen siç duhet dhe u ka siguruar përfitim, përkatësisht një pozitë juridike më të favorshme duke shmangur sanksionimin.