KIEV – Arrin në 21 numri i viktimave nga sulmet ruse

KIEV, 2 korrik /ATSH-AFP/ – Të paktën 21 persona humbën jetën dhe 85 të tjerë u plagosën, mes tyre dy fëmijë, pas një vale masive sulmesh ruse me dronë dhe raketa ndaj Kievit gjatë natës.

Kryebashkiaku Vitali Klitschko e cilësoi atë si sulmin më të rëndë ndaj kryeqytetit ukrainas që nga fillimi i pushtimit rus në vitin 2022.

Sipas forcave ajrore ukrainase, Rusia lëshoi 496 dronë dhe 74 raketa të llojeve të ndryshme kundër Ukrainës.

Mbrojtja ajrore arriti të rrëzojë 476 dronë dhe 48 raketa, por një pjesë e tyre goditi objektivat në Kiev.

Gazetarët raportuan se shpërthimet në kryeqytet zgjatën për disa orë, ndërsa alarmi ajror qëndroi aktiv për më shumë se 11 orë.

Operacionet e kërkim-shpëtimit vazhdojnë ende mes rrënojave.

Sulmet shkaktuan shembjen e pjesëve të ndërtesave të banimit, dëmtuan një objekt ku ndodheshin autoambulanca dhe prekën edhe një ndërtesë ku banonin anëtarë të personelit diplomatik, pa shkaktuar viktima në këtë të fundit.

Nga ana e saj, Rusia deklaroi se do të vazhdojë të rrisë presionin ushtarak ndaj Ukrainës.

Ndërkohë, edhe Ukraina ka intensifikuar sulmet me dronë në territorin rus gjatë muajve të fundit, duke goditur veçanërisht objektet e sektorit energjetik.

Pas tragjedisë, autoritetet e Kievit shpallën të premten ditë zie në nderim të viktimave. /Ad.Ab./  a.jor.