KIEV – Von der Leyen njofton marrëveshjen BE-Ukrainë për prodhimin e përbashkët të dronëve

KIEV, 15 korrik /ATSH-DPA/- Presidentja e Komisionit Evropian, Ursula von der Leyen njoftoi sot një partneritet të ri mes Bashkimit Evropian dhe Ukrainës për prodhimin e përbashkët të dronëve, me synimin për të bashkuar përvojën luftarake të Ukrainës me kapacitetet teknologjike dhe industriale të Evropës.

Duke folur në Sheshin e Shën Mëhillit në Kiev, Von der Leyen tha se Ukraina ka një përvojë unikale në përdorimin e dronëve dhe sistemeve kundër dronëve.

Sipas saj, Evropa disponon kapacitete të mëdha teknologjike dhe industriale, si edhe vende të sigurta prodhimi, që mund të ndihmojnë në rritjen e shpejtë të prodhimit.

“Ngjarjet këtu dhe në mbarë botën, kanë treguar se për sigurinë tonë është jetike, të jemi në gjendje të përdorim sisteme dronësh të testuara në fushën e betejës, në shkallë të gjerë dhe me shpejtësi”, tha ajo.

Presidentja e Komisionit Evropian theksoi se Partneriteti BE–Ukrainë për Industrinë e Mbrojtjes synon të nxisë investimet dhe të rrisë prodhimin në këtë sektor.

Von der Leyen mbërriti sot në Kiev, në vizitën e saj të 11-të në Ukrainë që nga fillimi i pushtimit të plotë rus.

Në një postim në platformën X, ajo e cilësoi vizitën, si një moment të veçantë, duke thënë se Ukraina ka fituar një vrull të fortë ushtarak dhe se “rrjedha e luftës po ndryshon.”

Gjatë vizitës, presidenti ukrainas Volodymyr Zelensky i akordoi Ursula von der Leyen “Urdhrin e Evropës”, një dekoratë që u dha për herë të parë.

Sipas presidencës ukrainase, nderimi iu dha për kontributin e saj të jashtëzakonshëm në mbështetjen e rrugës së Ukrainës drejt anëtarësimit të plotë në Bashkimin Evropian, ndihmën për vendin dhe forcimin e qëndrueshmërisë së tij në mbrojtje të pavarësisë dhe sigurisë së Evropës.

Pas ceremonisë, Von der Leyen shkroi në X se ishte e nderuar që mori këtë dekoratë.

Ajo vlerësoi shpirtin e popullit ukrainas, të cilin e përshkroi si “të pathyeshëm, të palëkundur dhe stoik”, duke shtuar se ai përfaqëson “shpirtin themelues të Evropës.” /