KIEV – Zelensky: Raketa që vrau një familje të tërë prodhim koreano-verior

KIEV, 30 korrik /ATSH-AFP/ – Presidenti ukrainas, Volodymyr Zelensky deklaroi sot se, sipas informacioneve paraprake, raketa e përdorur nga ushtria ruse në një sulm që shfarosi një familje në qendër të Ukrainës ishte prodhuar në Korenë e Veriut.

Në fjalimin e tij të përditshëm, Zelensky tha se sulmi në Radushne, pranë qytetit të Kryvyi Rih, është hera e parë pas një kohe të gjatë që Rusia dyshohet se ka përdorur një raketë të prodhimit koreano-verior.

Ai shtoi se ekspertët do të kryejnë analiza të mëtejshme për të konfirmuar origjinën e raketës, por akuzoi Moskën dhe Phenianin për bashkëpunim ushtarak.

“Fëmijët ukrainas po vriten nga aleanca mes kriminelëve të Moskës dhe regjimit të çmendur të Koresë së Veriut”, u shpreh Zelensky.

Rusia dhe Koreja e Veriut kanë forcuar ndjeshëm bashkëpunimin ushtarak gjatë viteve të fundit, ndërsa Ukraina dhe aleatët e saj kanë akuzuar vazhdimisht Phenianin për furnizimin e Moskës me armë dhe municione. /Ad.Ab./ a.jor.