Krapoviq para prokurorit: Raduloviq i bën kallëzimet nga interesa politike dhe financiare, për të ndalur lustracionin

Ministri i Mbrojtjes i Malit të Zi, Dragan Krapoviq, ka deklaruar sot para prokurorit të Prokurorisë Themelore Shtetërore në Podgoricë se avokati Veselin Raduloviq i paraqet kallëzimet penale kundër tij nga interesa politike dhe financiare, me qëllim diskreditimin e tij, të Ministrisë së Mbrojtjes dhe të Demokratëve, si dhe ndalimin e lustracionit, siç njofton Vijesti, e cila ka pasur qasje në procesverbalin e dëshmisë.

Krapoviq dha dëshminë lidhur me dy kallëzimet penale që ai vetë i ka paraqitur kundër Raduloviqit për kallëzim të rremë, duke i vlerësuar ato, sipas procesverbalit që citon Vijesti, si “absolutisht të bazuara, qartësisht të arsyetuara dhe plotësisht të mbështetura në prova”. Kallëzimet e tij pasuan pasi Raduloviq i kërkoi Prokurorisë Speciale Shtetërore (SDT) të hetojë ligjshmërinë e përdorimit të automjeteve zyrtare të Ministrisë së Mbrojtjes dhe angazhimit të Policisë Ushtarake gjatë udhëtimit të ministrit jashtë vendit në janar të vitit 2025, si dhe rrethanat e blerjes së dy anijeve patrulluese nga Franca dhe angazhimit, me kontrata pune, të ushtarakëve në pension.

Për udhëtimin e janarit 2025, Krapoviq tha para prokurorit se Agjencia për Parandalimin e Korrupsionit (ASK) e ka shqyrtuar dokumentacionin e Ministrisë së Mbrojtjes dhe ka konkluduar se nuk ka pasur cenim të interesit publik. Ai shtoi se si ministër i Mbrojtjes është person i mbrojtur 24 orë në ditë sipas ligjit, si në vendbanim ashtu edhe gjatë lëvizjes, dhe se mënyra e mbrojtjes së tij personale dhe mjetet e nevojshme janë të përcaktuara me elaboratin e sigurisë së ministrit, të miratuar nga kabineti i ngushtë i Qeverisë së Malit të Zi.

Edhe kallëzimin për anijet patrulluese ministri e quajti “plotësisht të rremë”. Ai theksoi se Kuvendi i Malit të Zi e ka miratuar ligjin për konfirmimin e marrëveshjes mes qeverive të Malit të Zi dhe Francës për bashkëpunim në fushën e mbrojtjes, me aranzhmanin teknik për blerjen e dy anijeve patrulluese, ligj i publikuar në Fletoren Zyrtare më 16 shtator 2024 dhe i hyrë në fuqi më 24 shtator të atij viti, dhe se për të gjitha detajet e aranzhmanit ka folur publikisht në seancën e Kuvendit më 9 shtator 2024. Ushtarakët në pension, shpjegoi ai, janë angazhuar për të ndjekur realizimin e kontratës së ndërtimit të anijeve sepse Mali i Zi nuk ka institute që merren me shkencat ushtarako-teknike, dhe kjo, sipas tij, i ka kursyer buxhetit të shtetit shpenzime dukshëm më të mëdha se sa po t’i ishte besuar puna një instituti të huaj. Krapoviq shtoi se deri sot as SDT-ja as Departamenti Special i Policisë nuk e kanë thirrur për t’u deklaruar për kallëzimet e Raduloviqit dhe nuk kanë marrë asnjë dokumentacion lidhur me to, siç raporton Vijesti.

Raduloviq, nga ana e tij, më 29 qershor të këtij viti i paraqiti SDT-së kallëzim penal kundër Krapoviqit, Demokratëve dhe disa personave përgjegjës ende të papërcaktuar në Ministrinë e Mbrojtjes, nën dyshimin për krijimin e organizatës kriminale dhe keqpërdorim të detyrës zyrtare, duke pretenduar se kontrata rreth 120 milionë euroshe për blerjen e anijeve, e nëntorit 2024, është lidhur pa u zhvilluar procedura e prokurimit publik. Krapoviq kallëzimet e tij për kallëzim të rremë i paraqiti më 5 tetor, për çështjen e udhëtimit, dhe më 16 tetor, për çështjen e anijeve. Avokati më herët i ka hedhur poshtë pretendimet se kallëzimet i bën për shkak të përkatësisë politike të ministrit, duke thënë se dokumentacioni zyrtar hap pyetje që organet kompetente duhet t’i verifikojnë, dhe se pret që prokuroria t’i kontrollojë pretendimet e të dyja palëve mbi bazën e provave.