Kryetari i Kuvendit reagon pas protestës: Dhuna ndaj policisë dhe deputetëve është e papranueshme

Kryetari i Kuvendit, Niko Peleshi, ka dënuar aktet e dhunës të regjistruara gjatë protestës para Parlamentit, duke theksuar se sulmet ndaj efektivëve të Policisë së Shtetit, deputetëve dhe institucioneve publike janë të papranueshme.

Ai nënvizoi se e drejta për të protestuar duhet të ushtrohet në mënyrë paqësore, ndërsa shprehu solidaritet me policët e plagosur dhe bëri thirrje për respektimin e ligjit, institucioneve dhe vlerave demokratike.

“Asgjë nuk mund të justifikojë dhunën ndaj punonjësve të Policisë së Shtetit, deputetëve të Kuvendit apo institucioneve publike. Shqipëria ndërtohet mbi dialogun, respektin për ligjin dhe institucionet, jo mbi përplasjen.

E drejta për të protestuar është një e drejtë themelore dhe duhet të ushtrohet në mënyrë paqësore. Kur protesta shndërrohet në dhunë ndaj njerëzve, cenon jo vetëm sigurinë e tyre, por edhe vetë vlerat mbi të cilat ndërtohet demokracia.

Solidaritet i plotë me efektivët e Policisë së Shtetit, të plagosur gjatë kryerjes së detyrës dhe shërim sa më të shpejtë.

Të papranueshme sulmet ndaj deputetëve të Kuvendit të Shqipërisë.

Asgjë e mirë nuk ndërtohet prej dhunës dhe kaosit”, shkruan Peleshi.