Kuvendi miraton në lexim të dytë ndryshimet në Ligjin kundër pastrimit të parave

Kuvendi i Kosovës miratoi të enjten, në lexim të dytë, projektligjin për ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit, siç raporton Ekonomia Online. Projektligji mori 61 vota për, pa asnjë votë kundër dhe pa asnjë abstenim.

Bëhet fjalë për Projektligjin nr. 11/L-017, i cili ndryshon dhe plotëson Ligjin nr. 05/L-096. Gjatë shqyrtimit, Komisioni për Buxhet, si komision raportues, kishte paraqitur gjithsej 12 amendamente.

Votimi u zhvillua vetëm me deputetët e Lëvizjes Vetëvendosje të pranishëm në sallë, ndërsa deputetët e PDK-së, LDK-së, Listës Serbe dhe Aleancës nuk morën pjesë. Sipas raportimit të Ekonomia Online, gjatë votimit të amendamenteve të propozuara nga Lista Serbe, deputetët e shumicës nuk morën pjesë në votim.

Miratimin e përshëndeti kryetarja e Kuvendit, Albulena Haxhiu, e cila tha se ndryshimet synojnë forcimin e mekanizmave për parandalimin e aktiviteteve financiare të paligjshme dhe mbrojtjen e integritetit të sistemit financiar të vendit. Pas votimit, Haxhiu mbylli punimet e seancës plenare për sot.

Në të njëjtën seancë, Kuvendi përzgjodhi edhe dy anëtarët joekzekutivë të Bordit të Bankës Qendrore të Kosovës, Nora Latifi-Jasharin dhe Bashkim Nurbojën.