Levica: Mickoski nga Nju Jorku tregon deri ku është gati të shkojë për “partneritetin strategjik” me SHBA-në

Partia Levica ka reaguar ashpër ndaj vizitës së kryeministrit të Maqedonisë së Veriut, Hristijan Mickoski, në Nju Jork, duke e akuzuar se me deklaratat e tij tregoi edhe një herë deri ku është gati të shkojë me politikën e tij të jashtme servile, në emër të të ashtuquajturit partneritet strategjik me Shtetet e Bashkuara të Amerikës.

Sipas Levicës, në samitin “Konkordia” Mickoski deklaroi se Maqedonia në Kombet e Bashkuara voton krah për krah me SHBA-në, se bashkëpunimi me Uashingtonin po thellohet në industrinë ushtarake, energjetikë dhe shfrytëzimin e mineraleve kritike, ndërsa përshëndeti praninë amerikane në rajon. Kreu i Qeverisë së Shkupit shtoi se ambicia e kabinetit të tij është që Maqedonia të bëhet shembull për Shtetet e Bashkuara — një “showcase” amerikan për rajonin dhe Europën.

Levica thekson se partneriteti nuk matet me retorikën diplomatike, por me atë se kush i përcakton interesat, kush e kontrollon kapitalin, kush i merr burimet dhe kush e paguan çmimin në fund. Sipas partisë, ndërsa Uashingtoni mbron interesat e veta strategjike, Qeveria në Shkup po i hap burimet maqedonase dhe infrastrukturën strategjike si hapësirë për kapitalin amerikan: në të njëjtën vizitë shtyhen përpara Çebreni dhe Galishta, infrastruktura e gazsjellësit, data-centret, antimoni te Kriva Pallanka, si dhe bashkëpunimi me industrinë ushtarake amerikane.

Në reagim citohet dallimi mes aleancës dhe vasalitetit: një shtet sovran mund të bashkëpunojë dhe të tregtojë me SHBA-në, duke udhëhequr njëkohësisht politikë sipas interesave të veta. Por kur njëra palë ka kapitalin, fuqinë ushtarake dhe ndikimin politik global, ndërsa tjetra garon të bëhet “showcase”-i i saj, nuk bëhet fjalë për barazi vetëm sepse marrëveshja nënshkruhet nga dy shtete sovrane, thekson Levica.

Burimi: Makfax