“Llogaria juaj bankare është pezulluar”, mesazhe mashtruese në emër të Bankës së Shqipërisë, BSH paralajmëron qytetarët: Mos klikoni në linqe, raportojini në polici

Mesazhe të rreme në emër të Bankës së Shqipërisë (BSH) po u dërgohen qytetarëve, ku u thuhet se llogaria e tyre bankare është pezulluar dhe u kërkohet të klikojnë në një lidhje për të përditësuar të dhënat e tyre bankare, siç njofton Shqiptarja.com.

Banka e Shqipërisë paralajmëron se këto mesazhe janë mashtrim dhe synojnë vjedhjen e të dhënave personale dhe bankare të qytetarëve. Institucioni thekson se nuk kërkon kurrë nga qytetarët të dhëna personale, fjalëkalime, kode sigurie apo të dhëna të kartave bankare përmes mesazheve, email-eve apo telefonatave.

Qytetarëve u kërkohet të mos klikojnë në lidhjet e dërguara, të mos u përgjigjen mesazheve dhe të mos japin asnjë të dhënë personale apo bankare.

Nëse marrin mesazhe të tilla, ata duhet t’i raportojnë menjëherë në polici ose në bankën e tyre. Nëse kanë dhënë tashmë të dhëna ose vërejnë veprime të paautorizuara në llogaritë e tyre, ata duhet të kontaktojnë menjëherë bankën ku kanë llogarinë dhe të njoftojnë Policinë e Shtetit.