“Lojtarët e Superiores shans në të ardhmen”- Maran: Jemi pak të limituar, objektiv kemi vendin e parë! Ja pse thirra Hy

Trajneri i Kombëtares shqiptare, Rolando Maran, ka shpjeguar sot (19 shtator) në konferencë, zgjedhjet e tij për ndeshjet e Nations League.

Ai u shpreh se ka bërë ndryshime në listë në minutat e fundit, teksa lojtarë nga Superiorja do të kenë shansin në të ardhmen.

Gjithashtu ai u ndal edhe te lojtarët e rinj, duke thënë se në krahasim me kombëtaret e tjera, Shqipëria është pak e limituar në këtë pjesë.

“Mund të ishin dhe lojtarë të tjerë të grumbulluar, por duke pasur parasysh që në disa pozicione kishim mungesa, kemi bërë ndryshime në minutat e fundit. Kam zgjedhur t’i besoj këtij blloku. Kampionati shqiptar ka lojtarë të veçantë dhe shpresoj t’i grumbullojë në ndeshjet e tjera.

Shumë shpejt do të shohim dhe lojtarë të rinj të grumbullohen. Objektivi ka qenë të dalim të parët në Nations League. Kemi sjellë lojtarë të rinj si Sina, por në këtë rast ka rëndësi rezultati. Mund të kem grumbulluar disa lojtarë ekstra. Mund të jemi pak të limituar krahasim me kombëtaret e tjera që kanë shumë opsione.

Interesin që kemi për të rinjtë, ata e dinë shumë mirë. Por duhet të jenë edhe kushtet ideale që ata të grumbullohen”, tha Maran.

Në fokus ka qenë edhe krahu i djathtë i mbrojtjes, ku Maran ka shpjeguar vendimin për të grumbulluar Elseid Hysajn dhe Ivan Balliun, duke theksuar se zgjedhjet janë bërë duke marrë parasysh karakteristikat e lojtarëve dhe mënyrën e lojës së ekipit.

Trajneri italian beson se Shqipëria ka mundësi të luftojë për vendin e parë në grup, nëse arrin të shfrytëzojë maksimalisht pikat e saj të forta.

“Të jemi të ndërgjegjshëm se cila është forca jonë dhe cilat janë karakteristikat që duhet të shfrytëzojmë. Për të pasur besim dhe vlerësim duhen rezultate shumë të mirë. Por jam i bindur që duke i pasur këto, do të arrijmë të bëjmë mirë.

Këta janë të duhurit aktualisht. Kemi dhe lojtarë të tjerë që mund të bëjnë edhe mbrojtësin e djathtë, Sina për shembull. Duke pasur parasysh edhe modulin se si ne luajmë, mendoj se mund të funksionojë.

Me lojtarët që kemi mund ta arrijmë vendin e parë në grup”, tha Maran.